𖼺𖽪𖾑 𖼂𖽕𖾐 𖼍𖽪 𖼷𖽻𖾐

       𖼺𖽪𖾑 𖼂𖽕𖾐 𖼍𖽪 𖼷𖽻𖾐，𖼦𖽑𖽺𖾑 𖽃𖽗𖾐 𖼰𖽚 𖼳𖽜 𖼰𖽡𖾐 𖼊𖽑𖽺 𖽃𖽗𖾐 𖼰𖽫𖾐 𖼖𖽚𖾐 𖼂𖽚𖾐 App 𖼣𖽻𖾐，𖽃𖽗𖾐 𖼰𖽫𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼀𖽑𖽪𖾐 𖼖𖽦𖾑 𖼺𖽺𖾑 𖼖𖽡𖾐 𖼀𖽑𖽙 𖼺𖽪𖾑 𖼂𖽕𖾐 𖼄𖽡𖽻𖾐 𖼊𖽙𖾐，𖽃𖽔 𖼊𖽺𖾑 𖼊𖽝𖾐 𖼊𖽻 𖼐𖽙𖾐 𖼊𖽡 𖼮𖽑𖽻 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾑 𖼊𖽝𖾐 𖼊𖽑𖽺 𖼍𖽪 𖼮𖽑𖽳𖾐．𖼦𖽑𖽺𖾑 𖼻𖽻𖾐，𖼺𖽪𖾑 𖼂𖽕𖾐 𖼷𖽻𖾐 𖼮𖽑𖽡𖽪 𖼀𖽶𖾐 𖼊𖽑𖽧 𖼖𖽻𖾐 𖼠𖽸𖾑 𖼳𖽶 𖼣𖽻𖾐，𖼖𖽡𖾐 𖼀𖽑𖽙 𖼺𖽪𖾑 𖼂𖽕𖾐 𖼷𖽻𖾐 𖼞𖽳𖾐 𖼦𖽑𖽔𖾐 𖼮𖽶𖾐 𖼻𖽜 𖼺𖽙𖾐，𖼦𖽑𖽔𖾐 𖼮𖽶𖾐 𖼖𖽳𖾐 𖼮𖽡𖽺𖾐 𖼳𖽶 𖼻𖽜 𖼊𖽪𖾐 𖼊𖽑𖽡 𖼊𖽝𖾐 𖼣𖽻𖾐．

       𖼺𖽪𖾑 𖼂𖽕𖾐 𖼷𖽻𖾐 𖼺𖽪𖾐 𖼳𖽪𖾑 𖼰𖽪𖾐 𖼐𖽑𖽡 𖼽𖽚𖾐 𖼣𖽻𖾐，𖼊𖽑𖽡 𖼽𖽚𖾐 𖼮𖽑𖽡𖽘 𖼰𖽡𖽦 𖼇𖽺𖾐 𖼳𖽪𖾑 𖼰𖽪𖾐，𖼊𖽑𖽡 𖼽𖽚𖾐 𖼽𖽔 𖼦𖽺 𖽃𖽜𖾐 𖼳𖽪𖾑 𖼰𖽪𖾐．𖼵𖽫 𖼰𖽡𖽦𖾑 𖼂𖽡𖽺𖾐 𖼮𖽑𖽴 𖼺𖽪𖾐 𖼦𖽫𖾐 𖼄𖽡𖽚 𖼳𖽪𖾑 𖼰𖽪𖾐 𖼊𖽑𖽡 𖼽𖽚𖾐 𖼣𖽻𖾐，𖼰𖽔𖾐 𖼳𖽾 𖼠𖽻𖾐 𖼄𖽡𖾐．𖼣𖽙𖾐 𖼈𖽳𖾐 𖼖𖽡𖾐 𖼀𖽑𖽙 𖼺𖽪𖾑 𖼀𖽑𖽚𖾐 𖼷𖽪𖾐，𖼣𖽝𖾐 𖼮𖽑𖽻𖾐 𖼂𖽺𖾐 𖼊𖽚𖾐 𖼖𖽻𖾐 𖼰𖽶𖾐 𖼮𖽑𖽡𖾐，𖼳𖽨𖾐 𖼀𖽙𖾐 𖼣𖽙 𖼊𖽝𖾐 𖼻𖽜 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼮𖽡 𖼀𖽑𖽡 𖼣𖽙 𖼍𖽪𖾐 𖼄𖽔 𖼷𖽑𖽶𖾐 𖼻𖽜 𖼺𖽺𖾑 𖼂𖽺𖾐 𖼊𖽚𖾐 𖼖𖽻𖾐 𖼺𖽺．

       𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽡 𖼞𖽔𖾐 𖼞𖽜，𖽃𖽔𖾑 𖼄𖽳𖾐 𖼖𖽡𖾐 𖼀𖽑𖽙 𖼺𖽪𖾑 𖼂𖽕𖾐 𖼍𖽪 𖼷𖽻𖾐 𖼖𖽚𖾐 𖼂𖽚𖾐 𖼦𖽑𖽺𖾑 𖼂𖽺𖾐 𖼊𖽑𖽧 𖼖𖽻𖾐 𖼦𖽑𖽻𖾐，𖼈𖽺𖾐 𖼖𖽡𖾐 𖼀𖽙 𖼈𖽧 𖼐𖽑𖽳𖾐 𖼞𖽑𖽙𖾐 𖼣𖽻𖾐 𖼞𖽜 𖼻𖽜 𖼊𖽙𖾐，𖼦𖽑𖽺𖾑 𖼺𖽡 𖼀𖽑𖽙 𖼮𖽡 𖼽𖽡𖾑 𖼈𖽳 𖼣𖽻𖾐 𖼮𖽶𖾐．

      𖼦𖽙𖾑 𖼦𖽙𖾑 𖼮𖽑𖽡 𖼮𖽑𖽡 𖼀𖽦𖾐 𖼠𖽳𖾐 𖼖𖽪𖾐 𖼈𖽧 𖼐𖽑𖽳𖾐 𖼊𖽑𖽺 𖼰𖽨𖾐，𖼦𖽑𖽔𖾐 𖼖𖽺𖾑 𖼈𖽺𖾐 𖼽𖽻 𖼈𖽳𖾐 𖼞𖽜 𖼻𖽜 𖽃𖽻𖾐．𖽂𖽙 𖼺𖽙𖾐 𖼂𖽙𖾐 𖼖𖽡𖾐 𖼺𖽪𖾑 𖼊𖽑𖽺 𖼮𖽑𖽪𖾐 𖼮𖽑𖽻 𖼞𖽜，𖼖𖽡𖾐 𖼀𖽑𖽙 𖼊𖽑𖽺 𖼮𖽑𖽪𖾐 𖼮𖽑𖽻 𖼞𖽜，𖽃𖽔 𖼄𖽜！